Հայկական ակնաբուժության նախագծի եւ Լոս Անջելեսի մանկական հիվանդանոցի 18-րդ միջազգային համաժողով

Մաս 2՝ նեոնատոլոգիա եւ ընդհանուր մանկաբուժություն (ներառյալ ներզատաբանություն եւ սրտաբանություն)

Հայկական ակնաբուժության նախագծի
(ՀԱՆ)  առաքելությունն է կանխարգելել
ձեռքբերովի կուրությունը
Հայաստանում

Ս.թ. փետրվարի 15-18-ը տեղի կունենա «Հայկական ակնաբուժության նախագիծ» բարեգործական հիմնադրամի եւ Լոս Անջելեսի մանկական հիվանդանոցի 18-րդ միջազգային համաժողովի երկրորդ հատվածը՝ նվիրված նեոնատոլոգիային եւ ընդհանուր մանկաբուժությանը (ներառյալ ներզատաբանություն եւ սրտաբանություն), որը կազմակերպվել է ՀՀ առողջապահության նախարարության, Շաքարախտի համաշխարհային հիմնադրամի եւ ոլորտային մասնագիտական ասոցիացիաների հետ գործակցությամբ:

Համավարակով պայմանավորված՝ միջազգային համաժողովն իրականացվում է առցանց, ինչը նոր հնարավորություն է տալիս ընդլայնելու նախորդ տարիների մասնակիցների եւ զեկուցողների թիվն ու աշխարհագրությունը՝ ընդգրկելով նոր երկրներ: Ընդլայնվել է նաեւ համաժողովում ներկայացված թեմաների շրջանակը՝առաջին անգամ ընդգրկելով մանկաբուժություն եւ սրտաբանություն:

Համաժողովի յուրաքանչյուր օր նվիրված է մեկ ուղղության` ընդհանուր մանկաբուժություն (փետրվարի 15), նեոնատոլոգիա (փետրվարի 16), մանկական ներզատաբանություն (փետրվարի 17) եւ մանկական սրտաբանություն (փետրվարի 18): Համաժողովին ելույթներով հանդես կգան վերոհիշյալ ոլորտների մասնագետներ ինչպես Հայաստանից, այնպես էլ ԱՄՆ-ի համաշխարհային ճանաչում ունեցող հիվանդանոցներից եւ համալսարաններից: Առցանց համաժողովին ելույթներից բացի կկազմակերպվեն նաեւ նեղ մասնագիտական քննարկումներ, որոնք կվարեն հայ եւ արտասահմանցի գործընկերները:

ՀՀ առողջապահության նախարարի հրամանի համաձայն, համաժողովի բոլոր՝ չորս օրերին մասնակցած մասնագետները կստանան ՇՄԶ ինքնակրթության 13 կրեդիտ:

Հայկական ակնաբուժության նախագծի եւ Լոս Անջելեսի մանկական հիվանդանոցի ստեղծած Մանկաբուժական կրթության առցանց հարթակում (Online Pediatric Educational Network - OPEN) արդեն հասանելի են համաժողովի առաջին մասի՝ ակնաբուժությանը նվիրված ելույթները եւ մասնագիտական քննարկումները: Համաժողովի ավարտին հարթակում հասանելի կլինեն նաեւ մանկաբուժությանը վերաբերող բոլոր ելույթները, ինչը մասնագետներին ինքնակրթության եւ ոլորտի նորամուծություններին ծանոթանալու եզակի հնարավորություն կտա:

Համաժողովի մանրամասները ներկայացված են ֆեյսբուքյան էջում՝ https://fb.me/e/1SkXGOl6u: